絲絲講場:恒生下半旗悼念利Sir

香港著名銀行家、恒生銀行(00011)名譽資深顧問利國偉博士上個禮拜六辭世之後,各界都深感難過。

絲絲聽老友話,尋日恒生銀行副董事長兼行政總裁李慧敏(Rose),喺內部嘅《晨早廣播》度率領員工悼念,並默哀一分鐘,而恒生尋日起亦一連三日下半旗向利Sir致意。

倡辦恒指 舉足輕重

其實利Sir一生對香港社會同金融界貢獻良多,好似我哋依家每日喺電視都見到、標誌住香港國際金融中心地位嘅恒生指數,就係利Sir喺一九六九年所提倡,所以利Sir嘅離去,令香港銀行界失去咗一位金融界舉足輕重嘅代表人物。

至於恒生發展至今日咁成功嘅規模,亦有賴利Sir嘅一份堅持。尋日Rose就憶述利Sir曾經講過:「恒生只係一間普通嘅銀行,為普通人而設,但係我哋提供嘅服務絕不普通。」就係因為呢份重誠信、穩健務實嘅性格,所以好多老友都同絲絲講,喺恒生就好似返到去一個大家庭,周圍都好有人情味。

創立恒商 作育英才

教育方面,利Sir亦幫香港做咗好多,好似一九八○年時,恒生銀行就同幾位恒生董事捐款創立當年嘅「恒生商學書院」,即係依家嘅「恒生管理學院」;佢仲推動成立何梁何利基金,支持本港同內地嘅長遠發展。

所以利Sir一生嘅成就同待人以誠嘅精神,真係好值得我哋去尊敬同懷念!

余詩韻