絲絲講場:長城電腦轉行搞商廈

好多老友同絲絲講,個人電腦PC呢門生意搵唔到食,所以內地有唔少IT公司都進軍房地產幫補一下啦!

工業地轉商用補6億

以硬件製造起家嘅長城電腦近期斥資19億元人民幣,打算起一棟佔地達到18萬平方米嘅寫字樓,命名為中電長城大廈,長城打算將其中60%嘅樓面賣出去;另外40%就會喺滿足咗公司用途後再轉租。

查實長城由一○年已經講話要起新寫字樓,原本只作為公司自身研發中心,但長城最近改變主意,新計劃要將原本嘅工業用地變為商業用地,所以長城要補成6億地價。

另外,建築成本預算亦由一○年嘅9.6億元人民幣升到去19億,但卻可為長城帶來巨額收益,好過做PC本行。

不過,個計劃依家仲處於構思階段,遲啲仲要等股東同意將公司嘅經營範圍由電子改為房地產及銷售先至會成事,一七年可唔可以落成仍然係未知之數呀!

余詩韻