呢排阿里巴巴嘅新聞好多，無辦法啦，盤生意咁大，連同佢哋有關連嘅單位，都成為市場焦點，原本喺內地冇乜名氣嘅天弘基金管理公司，全靠同阿里旗下嘅「餘額寶」掛鈎嘅增利寶，令到公司轉虧為盈。如果下半年生生性性，仲有機會創下成立九年以來嘅最佳表現添。
「餘額寶」屬於另類理財產品，推出嘅時候，都惹起唔少爭議，但又好成功喎，同「餘額寶」掛鈎嘅增利寶更加鯉躍龍門，短短十幾日成功吸金逾66億人仔，天弘基金終於成功喺上半年扭虧為盈，淨賺852萬元（人民幣‧下同），逃過咗連續四年蝕大錢嘅命運。
天弘基金由○四年成立以嚟，業績表現一路都令人好失望，喺一○年到一二年嘅三年入面，累計虧損更加高達5,000萬元。不過，今年上半年公司終於都靠「餘額寶」成功翻身，營業收入接近6,190萬元，純利達到852.5萬元。其中淨係餘額寶一項業務，就貢獻咗上半年收入嘅37%，可以話係扭虧嘅大功臣。
餘額寶牛刀小試取得佳績，天弘基金當然想再下一城啦，有消息話佢正計劃緊同阿里小微金融集團合作，推出新嘅互聯網基金產品。不過，其他基金公司又點會執輸呢，尋日外電就引述阿里集團發言人施致瑀話，旗下支付寶已經同37家基金公司達成合作協議，仲向中證監遞咗申請。至於合作嘅具體形式可以有好多，包括由支付寶喺呢啲基金公司官方網站提供支付服務都係其中一種。
余詩韻