尋日賓卡老友鄺國榮（Frankie）喺加盟富邦銀行（香港）擔任高級副總裁兼金融市場部主管之後，首次同傳媒朋友聚會。無見一排，環球經濟已經發生咗唔少變動，無變嘅係Frankie仍然係咁精靈，喺飯局上仲同大家有講有笑添。
話說席間有記者朋友問Frankie對下任美國聯儲局主席人選嘅睇法，佢竟然生鬼咁話：「下任主席究竟係Lady or Gentleman呢個話題可以開個賭局啦，哈哈！」佢講緊嘅男士，就係美國前財長薩默斯；女士就梗係聯儲局副主席耶倫啦。
有Sense唔驚金融危機
除咗經濟大事，Frankie仲講到佢喺銀行界打滾多年嘅心得，佢話做金融界一定要有sense，平時要密切留意環球市場資訊，喺危機發生前就要做定防風措施，仲要識得將唔同嘅蛛絲馬迹串連埋一齊。銀行家嘅經驗之談，絲絲都要參透吓先至得！