年初坐正做證券商協會主席嘅金利豐老闆娘朱太李月華，嚟緊呢個星期六係佢牛一，大搞「繽紛」生日派對，聽聞請咗過百位好友一齊Happy，絲絲都預祝佢青春常駐。
朱太今年嘅生日派對，會喺酒店泳池連Ball場度搞，淨係邀請佢最好嘅朋友到場，由於朱太長袖善舞，揀嚟揀去都要請成百幾人，筵開十幾圍，到時老友記大可盡情玩、盡情飲，朱太book定好多酒店房，就算醉咗都有房瞓，睇得出佢好細心安排。
原來朱太生日會每年對衣着都有特別要求，就係唔要西裝踢死兔，只要色彩繽紛，咁至可以增加party氣氛，而且每年都玩吓Gimmick，今年玩乜花臣？咪就係要戴帽囉，總之朱太最緊要係開開心心玩番晚。
余詩韻