絲絲講場：中銀ATM體貼視障人士
去銀行自動櫃員機（ATM）撳錢係好平常嘅事，但係對視障人士就係一個大難題，依家佢哋終於有救星啦！之唔係「語音導航自動櫃員機」囉。
尋日中銀香港（02388）分銷網絡副總經理張偉基（Rick），為全香港第一部語音導航ATM舉行揭幕儀式，為咗畀視障朋友一個方便，成本方面當然係唔緊要o架！
語音導航 唔驚撳錯
尋日有視障朋友就向阿Rick反映，話佢哋爭取咗呢部ATM已經有十年喇，以前喺櫃員機撳密碼只係聽到「嘟嘟」聲，所以成日都會撳錯密碼而畀部ATM食卡。
有咗語音導航就好好多，因為使用嘅時候戴住耳機，唔怕畀其他人聽到個人資料，而ATM嘅視覺畫面轉換成語音，資料就可確保萬無一失喇。
阿Rick預期到咗今年底，全港會有7部語音導航ATM，分布黃大仙、深水埗等地區，依家部ATM淨係可以提款，佢希望第日可以做埋存鈔機，咁就全面好多啦。
余詩韻