羅安達爆冷 生活貴絕
絲絲發現，上榜城市入面好多都係我哋耳熟能詳嘅地方，就好似莫斯科、東京、新加坡、日內瓦、蘇黎世呢啲大都會咁。不過排第一嘅就係安哥拉嘅首都羅安達，事關安哥拉係產油國，所以一公升油只需要0.63美元。不過，羅安達除咗汽油之外，其他嘢都貴到飛起，而進口貨就特別貴，就連一條牛仔褲都要賣200美元呀！
絲絲睇過啲數據，每個地方都有唔同特點，莫斯科嘅咖啡就最貴，要成8美元一杯；而香港嘅豪宅租金就係十個城市入面最貴，一間擁有兩間睡房嘅豪宅月租成7,000美元，而三間睡房嘅豪宅仲誇張，要成13,500美元，簡直係「貴絕全球」呀！
余詩韻