期指觀瀾:動力欠奉先行平倉

聯儲局主席伯南克周三晚在國會作證,提到購買資產計劃未有退出路線圖,美股靠穩,但在伯老講話後,急於在夜期搶到21,516點的肯定中伏,一來美股尾段升幅收窄,二來港股逢二進一,跟唔足外圍升勢的情況,仍然持續。

港股昨延續了多日來的疏落成交,即月期指開高走低,全日高低位21,460及21,244點,早在十時十一分已出現,隨後是21,280至21,350點的四小時橫行,直到收市前,好友稍為多兩錢肉緊,推期指上21,362點收市,但期指基本上未脫離過去六個交易日在21,150至21,528點的橫行區。

前日未平倉合約升至9.33萬張,悶局中期指未平倉合約上升,是否意味後市會有較大的單邊市出現?

筆者主觀睇法,這個可能性不能抹殺,連日期指在21,400至21,420點之間遭到淡友壓制,儘管成交唔多,但對好倉客不是好兆頭,尤其現貨多日都未能收於21,469點之上,即23,512至19,426點跌浪的0.5反彈阻力樓上。

滬綜指已率先跌破近一周橫行區,穿埋10日線2,024點,恒指波幅指數回到50日線樓下,看來之後爆上或者爆落動力都係有限,手上好倉值博率唔夠,今日先平倉再等機會。

John Mullen