絲絲講場:德盛安聯:港女喪偶唔愁生活

絲絲最近睇咗一個幾有趣嘅研究報告,叫做「年輕妻子的詛咒」。呢個研究係德盛安聯做嘅,研究目的竟然係睇吓現代女性喪偶後嘅經濟環境。

現代女性經濟獨立

研究報告引述數據話,三十個經合組織國家或地區中,有廿七個國家嘅年長女性比男性面對較大嘅貧窮風險。呢份報告就解釋,上一輩嘅女性教育水平較低、就業時間較短,所以婚後都好依賴丈夫生活;加上女性比較長壽,如果丈夫離世,大多數女性都要面對經濟環境轉差嘅狀況,而且仲要維持一段長時間。

不過今時唔同往日,現代女性個個都又靚又叻,經濟能力已經比上一輩嘅女性好好多,兩公婆嘅財政幾乎獨立。所以德盛安聯嘅報告就總結話,現代女性喪偶後受到嘅影響已經比以前細好多。今次呢個研究仲將女性喪偶後嘅經濟能力排名,香港同美國嘅女性齊名,成為全世界經濟能力最好嘅女性,可以唔使擔心喪偶後嘅生活。

不過話雖如此,絲絲當然希望,各位姐妹唔使考慮「如果老公死咗」呢啲咁不幸嘅問題啦!