中國通脹高，但存款利率長期跑輸就好多人都知，可惜A股又唔爭氣，搞到好多民眾都唔知將啲錢擺邊好，近日阿里巴巴就睇準呢個形勢，喺內地同天弘基金合作，推出「餘額寶」產品，迅即喺行內熱爆！
「餘額寶」喺六月十三日推出，截至六月底，即係短短十八日之內，累計用戶數已經去到251.56萬人，雖然平均每個人只係投資1,912元（人民幣‧下同），但正所謂聚沙成塔，總投額已經去到66.01億元，同佢哋合作嘅天弘基金更成為目前中國用戶數量最多嘅貨幣基金！
其實所謂餘額寶，即係阿里巴巴支付寶嘅用戶，將戶口中的餘額存入天弘基金嘅增利寶貨幣基金中，截至六月底，基金最新7日年化收益率高達6.299%，即係投資一萬蚊每日就有約1.66元，有網民仲忍唔住喺微博上大晒餘額寶帳單，表示自己存入200元，3日就有3分錢落袋！
有評論認為，掌舵人馬雲之前高調向內地金融業挑機，推出餘額寶確實係對商業銀行嘅一大威脅，不過亦都有人提醒用戶，餘額寶係屬於理財產品，並非存款，所以其實係要冒風險嘅！
余詩韻