近日內地山西一間餐廳發生咗爆炸，本來都不以為意嘅，但絲絲一睇見到個名叫做「小南國」，即時諗起喺香港上市嗰間小南國（03666），雖然絲絲搵唔到IR（投資者關係部）姐姐，但好在公司拿拿臨出通告劃清界線，話嗰間唔係旗下嘅分店，而喺山西亦無經營食肆。
記得之前絲絲去上海，就發現唔難喺條街搵到一間有「小南國」嘅餐館，啲名係有啲怪，好似叫小南國飯館、南京小南國、小南國酒店等等，好正常會以為係同一個集團，但事實就唔屬於上市嗰間公司(口架)啦。
香港上市間小南國全名其實係「上海小南國」，至舊年底喺中港兩地有66間上海小南國餐廳。
絲絲聽講話呢，以前嘅小南國打出名堂期間，已經有好多「姊妹」出現咗，好可惜公司未有正式登記，之但係到咗商業註冊時，又已經無符啦，唔通叫佢哋執笠咩。不過，「上海小南國」已經登記註冊咗。
余詩韻