絲絲講場：王國安不在位照砌港交所
證券及期貨專業總會會長王國安最近「升上神枱」，由會長轉任永遠榮譽會長。雖然冇得做會長，但佢揚言仍然唔會退下火線，若港交所（00388）有唔公平嘅制度出台，誓言同港交所抗爭到底。
卸下證券總會會長
話說王國安做咗證券及期貨專業總會會長都N年，係時候要轉莊。該會早前舉行大會，選出新一屆理事會。王國安仍然係15名理事之一，但就升上神枱，轉做永遠榮譽會長。
王國安話佢仍會企喺前線，將會加入證券及期貨專業總會嘅行業關注組。
咁又係，大家都知佢一向反對港股加時、「勁假」時段、隱名交易、夜期等，最近市場又傳出外資行發功要求港交所重推「勁假」時段，斷估王國安一定「阻頭阻勢」。
至於該會新任會長就要擇日至選出，因為程序規定新選出嚟嘅理事會，要待職工會登記局回覆，至可正式成立嘅。然之後再由理事會選出新嘅正副會長。
余詩韻