絲絲講場:印度借國安封殺微信

WhatsApp、LINE等不同即時通訊軟件方便易用,已經成為我哋日常溝通嘅必需品。不過絲絲收到消息,話印度政府以保護國家安全為由,有意喺當地封殺內地通訊軟件微信(WeChat)。

印度政府喺月初舉行跨部門工作會議時,有國家安全事務官員就話,微信會為印度嘅網絡製造出新嘅威脅,擔心中國會藉此入侵印度網絡,直接影響國家安全,所以先提議要封殺微信。雖然印度政府對係咪封殺微信仲未有定案,不過負責提供服務嘅騰訊公司已經「怕怕」,所以率先向外界表示,微信面對眾多海外用戶,一直都有遵守世界各地嘅法律。

疑為保護本土企業

保護國家安全固然重要,但絲絲聽講,印度政府係為咗保護本土企業先想封殺微信。騰訊公司喺上半年推出印度版微信後,至今已經吸引超過五十萬位印度用戶,加上中國嘅通訊產品同服務價錢都好平,受到唔少印度人歡迎,所以當局希望封殺微信後,印度公司喺市場嘅佔有率可以上升至超過五成。

其實微信都唔係第一個畀印度政府「關注」嘅通訊軟件,早前BlackBerry Messenger都一度引起過當局嘅關注,但後來事情都圓滿解決,所以絲絲覺得微信嘅粉絲都唔使咁擔心!

余詩韻