絲絲講場：港交所淡市好招才
窩輪及牛熊證呢類衍生產品，係大市好重要嘅部分，港交所（00388）一直想搵有衍生產品經驗嘅專業人士加盟，但之前個市咁旺，冇人肯過檔，家陣形勢唔同，大部分投行要瘦身，港交所「乘虛而入」，終於吸納到人才。
許振威離花旗加盟
喺四月辭任花旗環球金融亞洲認股證銷售部董事嘅許振威（Henry），早前先話喺金融界做咗13年，想趁機休息吓，點知小休兩個月左右，就已經泊到港交所呢個「大碼頭」喇。除咗Henry，去年上半年辭任蘇皇窩輪發言人嘅陳敢耀（Victor），早前都轉投咗港交所。所以話，有料嘅人，總會有地方畀佢哋一展所長嘅！
衍品經驗大派用場
Henry同絲絲講，自己喺一、兩個禮拜前加盟咗由港交所、上交所、同深交所合組嘅中華證券交易服務，擔任產品開發主管一職。雖然依家佢嘅工作唔使睇窩輪，但由於都會接觸到期貨等衍生工具，所以過往佢喺衍生工具市場累積嘅經驗依然啱用。
有窩輪業界人士話，之前市旺嗰陣，港交所好難搵到呢類專才，依家投行要節省成本，唔單只要瘦身，出手都冇以前咁闊綽，於是咪易啲吸納一批「失落」投行嘅業界精英囉。
余詩韻