港交所（00388）嘅交易大堂，出市員數目愈來愈少，直情係沒有最低，只有更低。絲絲最近發現，出市員嘅人數竟然跌到落去得番50人，即係話打麻雀，都唔夠十三枱，「人丁單薄」嘅情況都咪話唔誇張，直頭可以用兩個字去形容，「慘情」！
其實近年出市員喺交易大堂數目，已一直下跌，今年一月尾時，都仲有七十幾人，唔知乜嘢原因，五月份其中一個禮拜，人數竟然跌到得番50人，創出歷史新低。唔通真係同個市有關，「五窮六絕七翻生」？
啲經紀話，依家港股無啖好食，經紀行吊鹽水，慳得就慳，仲點會派出市員去交易大堂。
絲絲諗到個方法，就係港交所邀請多啲領導人去參觀交易大堂，啲經紀為咗同領導人拍照，應該好想去交易大堂，又或者新年派多幾封利是，自然吸引出市員「返來」！好似今年農曆新年後首日開市，有成一百個經紀喺交易大堂，熱鬧非常。
睇返交易大堂嘅發展，出市代表日少，新一輩可能覺得冇嘢，但一班老經紀就好唏噓，不知幾懷念八十年代嘅風光日子，嗰時有近千名交易員喺交易大堂運作，依家個場縮咗水大半，頻呼冷清啊！
余詩韻