近幾個月Facebook有好多secret pages，專講唔同學校嘅秘聞。其實呢樣嘢喺外國早已經流行，好似化名為Goldman Sachs Elevator（GSE）呢個Twitter用戶，就專門講美國投行高盛嘅八卦嘢。
GSE喺兩年前開始設立戶口，顧名思義佢會發布一啲喺高盛乘搭電梯時聽到嘅八卦趣聞，連高盛香港嘅八卦嘢都有機會發布到GSE。GSE內容大多數帶有諷刺性成分，講嘅嘢如一般銀行家畀外界嘅負面形象，好似自私，又或者階級觀念好重咁。雖然GSE一直匿名運作，但唔少高盛員工都好想知道，係邊個咁大膽成日講是非。
最近GSE幕後主腦就接受訪問，大爆GSE嘅運作模式。原來GSE有一班信得過嘅「線人」會定期報料，無論銀行家喺咩地方講過嘅說話都有可能成為GSE嘅材料，所以GSE可用嘅話題幾乎無盡。但GSE亦都會幫銀行家平反，佢話行內競爭大，有時銀行家講嘢會比較刻薄，但佢哋真人都好nice嘅。
GSE今次受訪係因為佢已經準備離開高盛，所以唔驚畀人秋後算帳。絲絲聽聞佢將會加入一個叫Gentology嘅網站，呢個網站專門售賣名人和明星嘅精選心水貨品，而且只係歡迎男性客人。有出版商準備幫GSE出書，話要將所有八卦嘢輯錄成書！