絲絲講場：康宏王利民想演「牙擦蘇」
康宏理財（01019）集團主席王利民（Quincy）早前入股第一信用（08215），除咗睇好私人貸款市場之外，絲絲就八八卦卦咁問起Quincy有無同第一信用主席冼國林（Checkley）開始傾吓合作模式，佢就好坦白咁話仲未同Checkley見面，連切磋功夫嘅機會都未有。
乜原來Quincy都識耍功夫o架咩？不過佢話，自己「骨格離奇」，好難同Checkley打過喎！
望客串《黃飛鴻》電影
講到合作，佢仲大爆知道Checkley會開拍新一輯《黃飛鴻》，希望有機會可以客串吓，做「牙擦蘇」都唔拘喎！嘩，「牙擦蘇」都算係第二男主角啦，當年除咗飾演黃師傅嘅關德興師傅膾炙人口之外，扮演「牙擦蘇」嘅西瓜刨亦都深入民心，相信Quincy真係要演活「牙擦蘇」呢個角色，絕對又會係佢另一個自我挑戰啦！
極地瑟縮七情上面
喺絲絲心目中，Quincy一向鍾意挑戰自我，早排先去完北極跑馬拉松，佢話手腳都凍到僵，好似搽咗大量收縮水咁，仲示範一次畀絲絲睇，見佢臉容扭曲，手手腳腳都瑟縮埋一齊，雖然係誇張咗啲，不過絲絲絕對體會到當時凍到咩程度！單憑呢個「搽咗收縮水」嘅動作，絲絲就覺得Quincy好有表演欲！所以話，唔係絲絲吹水，Quincy登上銀幕係遲早嘅事。
余詩韻