絲絲講場:百麗價崩股民勁呻

藍籌股百麗(01880)喺股東會前夕,股價竟插至一年新低,自不然有小股東牙痛咁聲。尋日有對年老夫婦喺股東會門外大呻,近期買入百麗幾萬股,依家帳面計就蝕咗十幾萬銀。公司首席執行官兼執行董事盛百椒都愛莫能助,只能嘆句「股價難以掌握」。

無登記被拒入股東會

呢對斯斯文文嘅年老夫婦尋日去到股東會門外,先發覺無登記參與股東會,可惜經過一輪溝通依然不准參加,老先生就突然講咗句,「買咗幾萬股,依家蝕成十幾萬」。咁就唔怪得佢心情唔多靚嘞,難得有機會向公司高層申訴,偏偏只能望門興嘆,不過尋日百麗股價叫做有所反彈,最多升逾5%,最終更穩守第三大升幅藍籌之位。

不過,百麗今年至今嘅股價跌幅依然超過兩成半,公司股東之一嘅盛百椒坦言,依家百麗正為長遠發展做好工作,可能短期會對業績有負面影響,但強調唔會畀股價表現影響,目的都係為公司健康發展着想。

余詩韻