Market Insight:電力股小注撈底

上周五美股表現平靜,道指微升8點。港股也終止上星期「四連跌」的形勢,昨日升67點報收22,686點,日股續見獲利回吐,再插3%,但經歷大半年狂升81%之後,區區跌幅市場當佢無到。反而港股反彈,成交額縮到今年新低,使得昨日升市說服力大減。

昨日沽空金額比上周五急跌四成二,得30.5億,沽空佔成交比例跌至7.16%,看來就連淡友都睇唔通,實行齊齊等周四結算前後至嚟過。近排成日聽到有云恒指及國企指數期貨六月合約呈現大低水,是大戶累積淡倉所為,真係「信佢一成、雙目失明」。事實係唔少國企六月除息,睇番恒指及國企指數除息後合理值係22,342點及10,416點,兩者期貨昨日收報22,382及10,452點,實際係高水緊,股民千祈唔好盲舂舂以為股災殺到埋嚟。

人民幣堅挺有因

全球主要股市今年升到阿媽都唔認得,A股不濟卻是路人皆見,古怪係人民幣近期愈升愈有,強得離譜,昨日兌美元見過6.1210,創下十九年新高,陰謀論認為人行咁進取「嘜價」,係為下月國家主席習近平訪美,同奧巴馬會面鋪路,避免匯率問題被擺上枱。早前提出,今年賭人仔升值好過賭A股的想法,看來正按劇本進行,十畫開始有三幾撇。

近期國際商品市場弱到震,商品貨幣澳元由1.04隊到落0.96,期間彈都唔彈吓,金價更係彈完即散,講到底,是市場對全球最大商品進口國中國的經濟前景,投下不信任票所致,製造業需求放緩趨勢未見底,這點在滙豐編制的中國採購經理指數(PMI)上月跌穿50盛衰分界線,證實想法雖不中亦不遠矣。

假如商品唔係錯價,最近本地中資股的走勢,就更耐人尋味。資金由經濟逆境下具備較高防守能力的燃氣、電力及家電中套現,轉投大落後的工業機械、航運及煤炭股,即使估計人行或遲或早減息(可能在通脹及樓價平穩下來的下半年),不過,產能嚴重過剩,三個行業本身亦各有毛病,業績改善空間令人懷疑,手上無電力或燃氣股,其實值得諗吓等基金食胡潮近尾聲,終極一跌出現時準備執平貨。

不利消息已反映

大行分析員「預期」發改委會減電價2%,居然成為電力股近日急跌的理由,大家搵藉口掟貨食胡的味道高於一切,昨日電力股仲未止瀉,華潤電力(00836)跌2.3%隊穿廿蚊關口,中國電力(02380)跌3.9%,大唐發電(00991)跌2.3%,華能(00902)跌1.2%。現時四隻股票的一三年預期市盈率回落至9.8、8.1、8及9.4倍,即使電價真係如傳聞中減2%,股價應該已反映得七七八八。收到風基金仍對潤電的合併相當不滿,暫時看被否決機會仲係高一線,可以等特別股東大會投票前先決定博唔博。

華能是煤電比例最高的股份,對煤價下跌的敏感及受惠度最高,大唐觀感差唔多。有趣是水力發電佔收入近半的中國電力,去年業績大反彈,煤炭採購成本下降幫助有限,主要是水力發電收益大幅改善。

今年內地降雨量暫時高於去年,首季水電發電量按年升了七成三,母公司中國電力集團剛表示準備投資過百億人民幣,加大投資水力發電,配合國家環保及經濟可持續發展的策略,股價自高位跌逾16%,同華能及大唐相若,莫非基金殺錯良民?昨日收市價幾乎跌到五月初起步位,今浪有機掂一掂50日線,或者可以試吓擺低十格八格博吓大霧。

水務股鑊氣漸增

昨日異動的板塊除科網、頁岩氣同光伏股之外,水務股亦有動靜,其中光大國際(00257)股價以全日高位6.33元收市,升幅近5%;獲花旗調高目標價至3.2元的北控水務(00371),股價創52周新高2.89元,收市升5.5%,報2.87元。

若短期板塊持續向好,想追落後,可以留意中國水務(00855),昨日收報2.6元,上升3%,月初以來股價呈反覆向上格局,人氣配合將有力再挑戰52周高位2.76元,10日線支持在2.5元。

古勝