絲絲講場：王亞偉摸底準到爆？
喺內地基金界響噹噹嘅王亞偉由舊年出山之後，就被視為股市可能好轉的風向標，唔知佢投資眼光準確度咁高，抑或世事真係咁啱，佢出山後成立嘅首隻陽光私募基金產品正正係A股嘅谷底，真係唔到市場唔信服。而呢幾日就傳出，王亞偉將啟動第二隻陽光私募產品嘅募集。又係咁啱得咁橋，A股又係谷底徘徊，唔通連個天都幫埋佢？
推新基金 規模二億
市場傳聞，王亞偉今次會拍平安信託一齊推出呢隻新產品，產品嘅類型同第一隻相似，門檻為二千萬元人民幣，目標客戶群更加係鎖定超高淨值嘅客戶，而固定管理費用都係同第一隻產品相同嘅百分之二點五，高過業界百分之二嘅平均水平添！有市場人士就話，王亞偉推出嘅產品門檻訂到二千萬元人民幣咁高，意味有更多更高淨資產值嘅人士會成為佢嘅客戶。
不過，同第一隻產品唔同嘅係今次規模上限只得二億元人民幣，遠低過上一次嘅二十億元人民幣。絲絲粗略計算吓，只得十位客戶可以獲得王亞偉第二隻私募基金嘅認購資格，消息人士仲話咁樣做係秉承華夏發行嘅飢渴營銷策略喎！
余詩韻