絲絲講場：大鱷隨口噏 睇低Fund媽媽
絲絲不嬲都好佩服職場媽媽，能夠事業家庭兩兼顧，美國著名對沖基金經理Paul Tudor Jones上個月喺維珍尼亞大學嘅討論會上，竟然話生BB同離婚係基金經理事業上嘅天敵，依家係咪歧視職場媽媽先？
擔心生B分身不暇
Jones話呢個世界冇嘢會好似親子之間嘅聯繫，所以當女性基金經理有咗小朋友之後，自然會將注意力放喺仔女身上，表現就好難再及得上男性，「你想唔想像到自己第一個小朋友頭二十年嘅時間，可以分身出嚟？」
佢話，基金經理幾乎要一星期七日，一日廿四小時咁on call，好似生BB、離婚呢啲人生大事，咪會阻住大家喺金融界發圍囉。
離婚又話令人分心
基金經理搞離婚就仲大件事，Jones話如果佢知道自己個位基金經理搞緊離婚，佢會即刻抽走啲投資，自動減少一至兩成由佢負責嘅投資，原因亦都係離婚令人分心，佢仲誇張到話，搞緊離婚嘅基金經理有紋有路諗嘢60秒時間及作出理性決定，直頭係無可能，有小朋友嘅家庭就仲麻煩啲添。
各位姐妹聽落係咪好唔順氣？有三位千金嘅Jones就補鑊話，當時都係隨口講吓，其實只要有能力、做事夠專注，又唔會被一件件無可避免嘅人生大事影響工作，無論男定女從事咩行業，都一樣可以成功。
余詩韻