絲絲講場：全球奢侈品 大款買起1/4
雖然內地官場提倡節儉後奢侈品行情大受影響，但德意志銀行首季全球奢侈品市場回顧及展望，估計中國一三年增長奢侈品消費仍達20%，佔世界奢侈品銷售額26%，增長幅度繼續係全球第一位，即係話中國仍係各大奢侈品品牌爭崩頭嘅戰場。內地市場競爭咁激烈，Gucci淨係喺上海都已經有成8間分店咁多嘞！
德銀嘅報告證明中國豪客絕對唔可以待慢，唔怪之得連外國大報《華爾街日報》都專程撰文，報道零售商點樣花盡心思、搞新意去吸引更多中國豪客。
外媒直擊競投珠寶豪情
報道直擊周大福珠寶店，早前就邀請咗200位最頂級嘅內地客仔嚟香港，參加珠寶拍賣同晚宴活動，當晚有超過100名周大福員工招呼呢班貴賓，咁大陣仗都係因為呢一班係非一般嘅大客，佢哋每個都曾經閒閒哋買過價值100萬人民幣甚至以上嘅珠寶，就梗係要有番咁上下嘅貴賓式待遇啦。周大福喺今次活動賺到400萬美元銷售額，成績仲比一二年嘅同類活動高25%添呀。
穿街坊裝買幾百萬珠寶
奢侈品公司另一大挑戰就係中國消費者嘅需求不斷變緊，當然整體口味係愈嚟愈成熟，但大家又估唔估到珠寶店個晚同場舉行嘅拍賣會，有位買咗其中一件價值幾百萬人民幣珠寶嘅豪客，就咁着住件T恤就嚟呢個相對哋隆重嘅活動呀！
所以話，絲絲始終都係嗰句：「人不可以貌相，尤其是內地人！」
余詩韻