絲絲講場:銀證贈寶玉黑白相配

真係擇日不如撞日,難得銀河證券(06881)同中石化煉化工程(02386)兩大新股碰頭,連港交所(00388)行政總裁李小加都畀面出席,絲絲都去咗上市儀式,湊吓熱鬧。

場面墟冚就不在話下啦,皆因單係銀證都破天荒有廿幾間投行護航,不過最令絲絲感興趣嘅係公司送畀港交所嘅禮物。話說早前銀證送畀投資者嘅和田玉玉牌已經惹嚟一陣討論,原因莫過於佢珍貴之處,但原來只係上集咋,因為和田玉係黑玉,配埋尋日送畀港交所嘅昆侖玉玉璽,就係白玉,一黑一白夾埋「黑白配」。

陳有安精心構思

咁有意思嘅原來係董事長陳有安嘅構思,絲絲八到,原來陳董對書法、玉石都好有研究。講番個玉璽,上面刻咗啲企業精神、使命及經營理念等,不過最矚目嘅可能係「有安藝術」呢幾個字,因為係陳董嘅藝術作品品牌,仲話揀呢兩款寶玉,都係象徵住「精誠所致、金石為開」,銀河證券亦係本住呢個信念嚟香港上市喎。

余詩韻