絲絲間唔中都會留意吓招聘廣告，睇吓有咩荀工可以介紹畀朋友。最近摩根大通就出咗一個幾特別嘅招聘廣告，特別之處唔在於佢哋嘅offer有幾好，而係呢個廣告喺字裏行間透露咗一啲有關倫敦金庫嘅「冷知識」！
今次摩根大通想招聘嘅係貴金屬清算專家（Bullion Physical and Clearing Specialist），廣告都循例介紹咗公司喺黃金市場嘅業務同職責。當中就提到，原來摩根大通持有嘅金條佔成個倫敦黃金清算市場45%，每日要處理5,000個交易，涉及嘅金額足足有400億美元咁多！
摩根大通嘅金庫仲同中國、印度、泰國同土耳其有寄售協議，亦會為客戶提供金條批發同貴金屬運送服務。
而呢個職位除咗負責幫客戶處理一般嘅貴金屬買賣交易之外，其中一項職責更要求員工幫手協調運金嘅工作，分分鐘可能要自己落手落腳搬埋一份！
其實講咗咁多內幕，摩通無非都係想話畀求職者知，呢份工一啲都唔易做，要諗清楚先好嚟見工啊！
余詩韻