絲絲講場:新地幫長者執靚家居

絲絲平時見新地代理租務部總經理鍾秀蓮,話題離唔開商場租務,今次好唔同,話題係裝修,佢冇轉行,只係同新地一班同事,去公屋幫長者做義工啫。

新地嘅「以心建家送暖行動」,協助弱勢社群進行基本公屋裝修,發揮同事嘅專業所長,新地義工隊成立十周年以來,多次協助受大型重建計劃影響嘅長者公屋戶,義工隊最近參與白田邨重建項目,為長者提供搬遷支援服務,以及基本新居裝修,協助他們融入新社群。

鍾秀蓮變裝修師傅

鍾秀蓮話,第一次嘗試裝修工作,原來要逐塊地板鋪滿間屋好唔容易。除咗佢之外,呢次行動仲包括新地義工隊總領袖梁麗慈、啟勝管理服務總經理韋韓淑貞及新地代理助理總經理(租務)孫雅茵,佢哋化身「裝修師傅」,加埋一眾新地義工,合力為受白田邨重建影響而遷往石硤尾邨嘅獨居或雙老長者,完成驗樓、鋪地板等工作,並探訪部分已入住新居嘅長者,了解他們嘅生活需要。

雖然做到身水身汗,咁有意義嘅工作,大家都笑住嚟做。韋韓淑貞就話做義工無論辛苦與否,見到佢哋開心,自己就會更加開心!

余絲韻