Market Insight:市底不俗挑戰阻力

日歐加入量寬及超低息的威力真係勁,港股假後復市,一升就410點,恒指收報23,493點,成亞洲區內最威水市場,主板成交690億元仲要係近個半月新高,唯一較弱係升跌股份比例,60對40,差過上周三62對38比較,可見資金入市其實相當揀擇。

港股由四月低位21,423點起步,至今累積升幅9.66%,對比美股日股近期屢創新高,港股連年初高位23,944點邊皮都未掂到,難免教人想到,近期升浪似基金追落後多於一切,尤其資金寒暑表,港匯近日無轉強迹象,昨日在7.762附近,同舊年年底長期企穩強方兌換保證7.75比差一截。

高盛沽貨似有啟示

樂觀嘅或者認為熱錢未全面湧入,港股相對有水位,但觀乎藍籌權重股,今年中移(00941)因4G固定投資唔明朗,落後於人,中石油(00857)及中海油(00883)在國際油價被商品市場大插拖住後腿,升幅也少於大市。三隻佔指數比重一成七的內銀股,經過昨日抽升,本來勉強升勢拍得住恒指,點知收市後,工行(01398)策略股東高盛,以2.5至3%折讓,介乎5.47至5.5元減持手上最後一批市值11億美元的工行。

話就話今次清倉,○六年四月開始的策略股東身份告一段落,以後唔怕高盛再大手減持,惟這間以坐盤坐到出神入化,年年賺大錢的美資投行,揀呢個時候沽貨,實在令人有小小擔心,至少中短期內,佢哋睇內銀股叻唔到去邊。唔信?上一次,即係一月份高盛以5.77元減持的一批工行,接貨者一接就坐艇坐到今日!

在全球資金氾濫,美日股市愈升愈有帶動下,相信港股遲早會升穿年初高位23,944點。好似季績理想的騰訊控股(00700)可以連抽兩日,累積升35元,挾起淡倉上嚟,真係乜都有可能。昨日所見,資金對風險資產興趣的確有改善趨勢,跌市中一直領先大市的電力、家電及燃氣股,在高位有回落迹象,反之大落後的航運、煤炭同內需股都見資金回流,尤其十年唔發市的蒙牛乳業(02319),在多間大行唱好Danone入股的結盟後,走勢相當標青。

古勝可以預期,當恒指短期內突破年初高位,刺激最後一批猶豫的騎牆派都入市,更多落後甚至蚊型股都有炒起的可能,股民保險箱內發霉的股票,看來有重見天日的機會。

剛提到,愈來愈多基金經理及分析師估計,今年餘下時間中央在國五條之後再推調控樓市辣招的可能性唔大,唔單止內房股,就連內地樓市準買家也有相似睇法。銀紙向來唔識得講大話,三月時推國五條之後,四月份全國70大城市樓價,同去年同期或者三月份比較,仲有68及67個城市錄得升幅,國五條可能減慢樓價上升的速度,但並無改變樓價上升的方向。

中型內房具值博率

昨日古勝話要睇實內房股Big 5,昨日埋單升幅介乎1.3至7.6%,世茂房地產(00813)升1.79%,相對大市算僅僅合格。諗深一層,既然相信後市有機會呈雞犬皆升格局,一於博大啲,不妨搵「晒士」高於大部分基金10億美元,即78億港元市值入貨門檻,但又無big 5咁難推得郁,上落更快的中型內房股,揀了首四個月銷售進度唔錯,目前市帳率低於1倍,市值有110億至220億元的幾隻中型內房股,個人就較為睇好越秀地產(00123)、保利置業(00119)、合景泰富(01813)、深圳控股(00604)及佳兆業(01638)幾隻,唔知看官有冇啱心水。

光伏股未脫上落格

雖然恒指升超400百點,但唔係每個板塊都受惠,好似光伏股上周仲升得好地地,昨日又冇晒影。保利協鑫(03800)以及卡姆丹克(00712)分別跌5.8%及4.1%、興業太陽能(00750)跌0.9%,主要係受傳聞歐盟擬對中國光伏產品徵收反傾銷關稅影響。

總而言之,炒上嘅時候就話憧憬阿爺補貼,回軟嘅時候就話憂慮歐盟徵稅,舊聞不斷翻炒,最終板塊表現也不離開上落格局,兼且炒風短癮,跟炒轉身真係要夠快!

古勝