絲絲講場:TOPSHOP登陸中環「插旗」

絲絲等到頸都長,終於等到英國時裝連鎖店TOPSHOP登陸香港喇!其實當H&M、Zara同Forever21相繼來港後,市場上都成日盛傳TOPSHOP會登陸,傳咗咁耐,TOPSHOP尋日終於發新聞稿,宣布六月六日將喺香港核心地段中環,開第一間大中華區嘅旗艦店。

萬呎舖面對正H&M

絲絲聽講,嚟緊喺中環開幕嘅TOPSHOP,舖面面積有成14,000平方呎,仲係大中華區第一間旗艦店!佢哋仲強調,每個星期都會有300件貨品到港。而絲絲最期待嘅,就係TOPSHOP為客人提供嘅「個人購物」服務,會幫客人提供形象指導!連佢哋老闆格林(Philip Green)都話,有信心可以吸引到一眾嘅潮男潮女去掃貨咁話!

絲絲另有一個最興奮嘅地方,就係TOPSHOP將會開喺中環皇后大道中59至65號嘅泛海大廈。事關呢個地址就正正喺H&M嘅對面,以後絲絲睇衫可以一次過逛晒兩間舖,簡直係一石二鳥呀!當然TOPSHOP同H&M就唔係咁諗!

余詩韻