絲絲講場：利豐強陣見股東
兩大出口股思捷（00330）同埋利豐（00494）輪流開會，尋日絲絲先去利豐股東會打聽今年業績嘅消息，估唔到除咗現任主席馮國綸（William）同總裁樂裕民（Bruce）有現身外，仲難得見到前任主席馮國經（Victor）同兒子馮裕鈞（Spencer）同台列席，連非執董女明星梁高美懿同另一位非執董傅育寧都有露面。
梁太喺恒生銀行（00011）退休後，家吓身兼多間上市公司的董事會成員要職，上月起仲做埋利豐獨立非執董。
梁高笑言「無股東鬧」
佢喺會後同絲絲講，覺得利豐股東會都「Okay」，笑笑口話「無股東鬧」，睇嚟梁太入得利豐董事會，早有心理準備，不過尋日股東會整體氣氛真係好和諧。
全程只有一千零一位股東勇敢發問，就係外界成日話利豐增長模式已改變，究竟係咪？
馮國綸為業務護航
問題直接，不過難唔倒William，佢好快就挺身「護航」，指公司業務趨向多元化，經營模式只是增加，並沒改變。成個會全權由William發言，董事會成員未見交流，不過相信Spencer偷師不少，而Victor亦放心晒。
余詩韻