AH對碰：中集翻炒前海概念

內地近周不停派發經濟數據，要認真地研究數字，真係頭都大。繼通脹之後，昨日又有固定資產投資、社會消費品零售總額。簡單而言，內地經濟動力唔強，通脹回升得來又唔算高，暫時斷估中央唔會大閂水喉。

不過，股市反應好直接，A股同經濟一樣，無水又無動力。滬綜指昨日跌近5點，收報2,241點，點數的變化唔大，但個別板塊卻出現了明顯震盪，金融、地產、煤炭、有色金屬以至券商股均回調。

在本港上市的A+H股份之中，跌得較多的是金融類的銀行、券商股，民生銀行（01988）急挫5.2%，收報10.08元，跌幅大過其A股的0.6%，而兩隻券商股愈跌愈多，中信証券（06030）及海通證券（06837）分別下跌4.2%及5.1%，至17.18元及10.68元。

昨日跌市之中，前海概念股相當堅挺，因有指深圳前海啟動土地政策改革，仲話未來幾星期會有第一批土地出賣，時間表如何都係要觀望，但相關政策繼續前進，概念股的確是可以炒完又炒。

由B股轉來H股上市的中集集團（02039），去年業績乏善足陳，盈利下降47.5%，因公司從事集裝箱及道路運輸業務，去年這兩大主要收入都減少，而今年首季總收入跌4.5%，盈利降41.5%，未有明顯改善。

不過，其實中集的值錢之處，是公司在前海擁有唔少地皮，市場一直盛傳中集集團是前海「三大地主」之一，有指擁有高達50萬平方米的前海土地儲備，相關估值不菲，看來潛在價值有待爆發。

一飛