短炒王：精電仍具上升空間
日本央行實施大規模量寬，日股升唔停，日經指數上周五飆高416點後，昨日再升174點，是表現最好的環球主要市場。日圓持續貶值，美元兌日圓上周終升穿100大關後，昨日企穩於101水平樓上。日圓處於逾四年低點，市場估計日本人會加快到海外購買資產，日圓會進一步下滑。
受惠日圓持續貶值
有錢大戶今年以來買日股，沽日圓做番對沖，贏到荷包脹，一般散戶礙於資訊所限，未必有咁多渠道進攻海外市場，但買啱日圓貶值受惠股，都執唔少。精電（00710）作為工業股，從事汽車及工業用顯示屏業務，近年業績相當反覆，○九年見紅，蝕2.68億元，一○年收入增長理想，由虧轉盈，賺2.1億元，可惜動力不足，一一年盈利倒退，一二年則微增1.6%至1.71億元。
然而，股價如坐火箭，今年初還不過是3元左右水平，半年唔到已升穿6元，昨日回軟至6.27元，累升逾倍，是○五年以來新高。
原因好簡單，因精電大部分零件都來自日本，比例超過65%，日圓貶值的利益非常直接，加埋新生產線，新市場的開拓，以及原來市場的復甦等多方面利好因素，對一隻往績市盈率只有11倍的股份而言，仲有唔少上升空間。短期操作參考，阻力位7元，支持位5.5元。
達哥