澳洲經濟增長前景未明、中國擴張又有放緩憂慮、澳元高企，都是近期澳元持續受壓的原因。
今年年初已有報告指，澳元是全球最被高估的貨幣，因為澳元已升至近三十年高位，所以吸引索羅斯呢類專食大茶飯的大鱷絕對唔出奇，當散戶仲為咗3厘利息都無嘅澳元去做定期時，喺索老眼中，沽澳洲紙卻係「世紀難逢」的良機！
澳洲央行聲明入面，其實睇法都仲係幾悲觀，依家2.5%嘅通脹仍符合央行目標同低於預期，換句話講減息周期仲未完，有需要時可以再減。筆者講過好多次，有減息壓力、息差收窄就會拖住澳元後腿，買入澳元暫時都未係好值博。
澳元自去年八月於1.0150至1.06橫行近三季，但上周外匯期貨澳元淨持倉由3萬張急跌至6,000張，確認向下作出突破，按量度跌幅，或會跌至0.97至0.98水平。
策略上，建議今個星期有機會見番1.0170的話，不如跟索羅斯沽澳元，止蝕於1.0280，目標先睇1算水平。
GMO CLICK環球通副總裁 陳健豪