絲絲講場：內地投資先學打麻雀
絲絲平日都鍾意玩下衞生麻雀，但無諗過原來打麻雀同投資內地都有共通之處！事緣交銀國際研究部洪灝喺報告講開，投資中國有如「打麻雀」。簡單啲講，就係內地有關部門限購咩就買咩，佢並以麻雀投資定理嚟命名。
愈限購愈要入貨
洪灝話，過去幾年，每當內地當局限購某啲商品，好似房地產、車牌咁，佢哋嘅價格就會畀投資者炒起；相反，當局力捧嘅藍籌股就表現麻麻。洪灝指投資者應該好似打麻雀咁，知道對家想要咩牌就專登唔打出，仲要自己留起，等佢食唔到胡。
佢以樓市調控為例，當監管部門要限購房地產，其實正正暗示咗樓宇供應即將短缺，樓價會急升，所以當局先唔支持買入；呢個時候，投資者就更應該將房地產放入自己嘅投資組合，等待日後樓價上升，自然可以「食胡」啦！