思捷（00330）投資者日今日終於喺德國舉行，主力講解番改革計劃嘅最新進展。早排絲絲都有聽到，唔少大行仍然緊縮開支，令今次唔係咁多投資者同分析員親身去到德國參加。
所以思捷都識變通，佢就學其他搞投資者日嘅上市公司──滙控（00005）同利豐（00494）咁，搞埋網上直播，確保去唔到嘅人都可以同步收到最新資訊。呢樣認真抵讚！投資者日前夕，思捷股價逆市升0.5%。
講番轉頭，思捷喺一一年間交出一份「驚嚇」嘅成績表後，為咗挽回市場信心，同年十一月就首次搞投資者日，仲帶投資者去參觀新嘅概念店，當時市場都幾受落o架，帶動股價彈番少少。到舊年思捷原定喺六月搞第二次投資者日，點知臨時殺出主席同行政總裁雙雙劈炮唔撈，令活動泡湯。
家陣新行政總裁「坐穩」，仲請咗幾個Zara嘅勁人返嚟協助，終於搞得成投資者日喇！雖然思捷已經冇咗藍籌股嘅身份，絲絲仍然好希望佢生生性性，唔好再令一班公公婆婆級嘅忠實粉絲失望！