絲絲講場：瑞銀慈善基金來港打躉
唔少人做善事既出錢又出力，瑞銀慈善基金會（UBS Optimus Foundation）尋日喺香港成立地區辦事處，希望進一步拓展亞太區嘅慈善事業，並改善包括中港兩地等亞洲區貧困兒童嘅生活環境。對於近期社會瀰漫抗拒向內地官方機構捐款嘅情緒，瑞銀話到明會增加透明度，保證捐款會好好利用。
做埋客戶捐款顧問
近期內地四川發生嚴重災害，有擔心捐款會畀貪官中飽私囊，瑞銀北亞區慈善事業服務主管董黎瀅（Christina）就話，為確保錢係用得其所，佢哋會喺香港開辦事處，並會到當地進行考察。
提到港人做善事情況，瑞銀財富管理亞太區行政總裁施許怡敏（Kathryn）講，其實好多有錢客戶想回饋社會，都會搵佢哋問意見，而有部分大額嘅捐款，基金會仲可以幫佢哋度身訂造，不過基金會只係集中幫助有需要兒童。
據瑞銀介紹，基金會喺一九九九年創辦，迄今已收到1萬8千筆捐款，有成2億瑞士法郎。
余詩韻