孖妹S檔案：公司上市 心意巡禮？

港：港交所發言人

高妹：過往有不少上市公司會送贈紀念品予港交所留念，未知這些紀念品放在哪裏呢？

第一代 琉璃馬擺件	第二代 水晶金箔牛	第三代 銅牛雕塑

港：現時港交所儲存約1,600件紀念品，大部分為公司於新上市時所送贈，喺收到紀念品後，我哋會為紀念品作出詳細記錄，包括註明送贈機構嘅名稱和送贈日期，亦會為紀念品拍照及附上編號。現時，我哋將部分紀念品放於交易所訪客廊及交易所展覽館內嘅貴賓室展出，亦會不定期更換各處展示嘅紀念品，方便訪客去欣賞。至於其他未作展示嘅紀念品，就會儲存位於將軍澳辦事處嘅儲物室。

彩兒：正所謂「禮尚往來」，港交所有無回禮？

港：九十年代時期，絕大部分公司於上市時都無向港交所致送紀念品，例如九二年和九三年在港上市嘅招商局國際（00144）和青島啤酒（00168）亦不例外，但在上市儀式完成後，港交所會將儀式上所食用燒豬嘅頭和尾，以禮盒包裹後，回贈新上市公司，寓意「順利吉祥」。直至近年，不少公司開始自發性在上市儀式時送贈紀念品予港交所，因此由○七年起，我哋亦向新上市公司送贈紀念品，當時嘅紀念品是琉璃馬擺件，其後換成水晶金箔牛，一二年則換成由本地雕塑家林可頤設計嘅銅牛雕塑。

高妹： 哈哈，咁眾多紀念品中，邊件體積最大及最細？價值最貴又是甚麼呢？

港：在這些紀念品當中，體積最大件的為上市公司好孩子（01086）送贈嘅嬰兒車，約1200mm（闊）x1050mm（高）×500mm（深），而體積最小的則為錢幣，約35mm（闊）×35mm（高）×2mm（深）。其實不少由上市公司送贈嘅紀念品，設計均與代表上市公司所經營嘅業務有關係，而港交所亦不會向上市公司查詢紀念品價值，因此無資料顯示哪件紀念品價值最高。

「最具歷史價值」

上市公司：建行（00939）

紀念品：燙金股票

孖妹點評：想當年建行身為首批來港上市嘅內銀股，送畀港交所嘅紀念品自然要有歷史性紀念價值啦，將實物股票燙上一層黃金，夠體面之餘亦有分量。孖妹睇番彭博數據，發現建行自○五年十月廿七日上市至今，股價升幅約1.7倍，成績可謂驕人，難怪該股一直都係本地投資者嘅愛股，貪其穩陣而且派息率高。

「最重磅級厚禮」

上市公司：好孩子國際（01086）

紀念品：嬰兒車

孖妹點評：於一○年十一月來港上市嘅好孩子國際，主要從事設計、製造和銷售各式各樣嬰兒用品。不過，孖妹認為該公司在上市儀式時送贈嬰兒車畀港交所，賣廣告目的太過明顯喇。雖然如此，但呢架嬰兒車卻是港交所嘅紀念品倉庫中體積最大型的，成功靠「大」突圍而出。其股價年初至今勁升34.29%！

「最夠金碧輝煌」

上市公司：特步國際（01368）

紀念品：鑲金運動鞋

孖妹點評：雖然話「物輕情意重」，但特步國際呢份紀念品就認真「重本」喇，將成隻運動鞋鑲滿黃金，連孖妹都唔敢估佢究竟值幾多錢！之不過，近年內地體育用品股發展前景正值樽頸位置，賣波鞋嘅利錢已不復當年勇。以特步為例，該股上周五收報3.3元，年初至今微跌0.9%。依孖妹看來，其股價要似「金鞋」一樣昂貴，未來業務仍須努力了。

「最有本土風味」

上市公司：翠華控股（01314）

紀念品：「奶油豬」及「奶茶」模型

孖妹點評：翠華將鎮店之寶––「奶油豬」及「奶茶」整成「睇得唔食得」嘅模型相贈港交所，「盞鬼」得嚟又有點香港飲食文化特色！猶記得翠華剛上市時嘅估值偏貴，但有證券界預測，翠華存在持續增長潛力，料未來每年盈利增長三至五成，升值潛力不容忽視。的確翠華上市至今已升咗八成幾，買咗佢飲幾多杯奶茶都得！

「最襯尊貴身份」

上市公司：新世界百貨中國（00825）

紀念品：VIP會員卡及金幣

孖妹點評：普天下嘅女性都愛瘋狂購物，而新世界百貨中國特製呢張超大嘅「VIP會員卡」送畀港交所，認真盡顯尊貴地位喇！講番呢隻股票，集團在內地市場主攻中高檔零售，旗下銷售的產品多不勝數，如時裝、配飾、珠寶及化妝品等等，近年搞埋網上商城服務，成功吸納網購消費者，該股上周五收報4.3元。話時話喇，唔知港交所可否借呢張「VIP會員卡」畀孖妹用呢？

高妹＆彩兒

若有料報畀高妹同彩兒或有嘢問，可電郵money.biz@opg.com.hk