俄鋁（00486）不嬲都好熱衷於推廣俄羅斯文化及中俄交流。佢哋今次就諗住「搞」電影，再加埋「飛卜」（facebook）嘅有獎問答比賽，等大家可以了解「真正俄羅斯」。
俄鋁上市咁多年以來，試過出版旅遊書、特備電視節目、攝影比賽等等，致力推廣俄羅斯文化。絲絲真心感受到佢哋嘅「熱心」。
其實之前俄鋁嘅美女公關大員Vera都曾經向絲絲透露，想搞「俄羅斯電影節」，估唔到Vera不但「講得出、做得到」，仲好快手添。
俄鋁今次會同專門喺世界各地推廣俄羅斯文化嘅文化機構Academia Rossica，合辦今次喺香港嘅首屆俄羅斯電影節。
選映嘅作品由史詩式寓言，以至劇情、奇幻電影都齊備，以求展現俄羅斯電影嘅多元活力。
同時間，俄鋁為咗慶祝電影節，會喺四月二十九日至五月底期間，喺佢哋嘅facebook專頁搞問答比賽，答中全部或者最多問題嘅參加者，即有機會獲得電影節開幕禮門票同iPad Mini。大家記得唔好錯過喇！