絲絲講場：歐達禮領導亞洲打虎
證監會近年一改以往「無牙老虎」嘅形象，屢次大發虎威，加強監管力度，令金融界無不「聞風喪膽」。
最近佢哋又多一單「升呢」嘢！證監會行政總裁歐達禮5月將正式「榮升」國際證監會組織（IOSCO） 屬下亞太區委員會（APRC）主席，係香港首次有人喺IOSCO坐咁高位，都算為港爭光。
掌IOSCO亞太分會
雖然唔係好多香港人知IOSCO係乜組織，但其實IOSCO喺監管機構中「輩份」好高 ，佢哋嘅會員監管全球達115個司法區嘅證券市場，而整個組織按地區分成四個大型委員會，包括歐洲、美洲、中東/非洲及亞太區。
歐達禮今次就係代表香港出任其中一個地區委員會主席，領導亞太區內25名成員。
呢個位比過去證監會啲「老頂」，好似前行政總裁韋奕禮做過IOSCO旗下沽空工作小組主席，甚至前主席沈聯濤做過嘅技術委員會主席，職位都要高。
提升香港監管牙力
有中環人士就講，雖然話IOSCO冇實權，訂立嘅監管標準制度，會員未必一定要跟，但香港坐咗呢個位，可以增加喺國際監管事務嘅話語權，即係可以「做大佬」，有助提升香港金融市場嘅地位。
歐達禮對做APRC主席都有幾大期望，佢早前就曾經講過，希望見到APRC可以成為亞洲區內一把積極主動聲音，促成區內各個司法區就監管問題進行全球性對話。
余絲韻