絲絲講場：恒生林燕勝睇廠做偵探

檢驗財報十足醫生

Donald平時雖然已經好忙，但係每年都仍然會帶一班管理培訓生去實地睇廠，學做偵探。Donald話如果見到個倉入面擺咗好多紙箱，就會諗究竟係即將出貨定係擺好耐嘅存貨呢？於是佢就提醒同事，記得摸紙箱頂，如果鋪晒塵，抹到手都污糟埋，就估到擺咗好耐啦。

除咗睇廠，Donald最記得就係金融海嘯時，成日與同事一齊睇財務報表，幫企業「斷症」，連同事都幫佢起花名，叫佢做「醫生」。依家最困難嘅時候似乎已經過去，Donald話今年好多客戶頭兩個月出口貿易都有改善，佢原本估下半年先轉好嘅市況，好消息已經提早出現。

絲絲聽落Donald星期一至五返工已經忙到七彩，原來佢星期六都有例行節目，就係陪客戶打高爾夫球嘅「打波日」，佢形容自己就係建立人際關係網嘅網絡工程師，但係星期日就點都要留返嚟陪太太，近排仲愛上同太太一齊行山添，而兩個讀緊書嘅仔仔，就係佢嘅「好兄弟」，因為大家關係似老友多過父子喎。