要完成42公里嘅標準馬拉松，跑手少啲毅力都唔掂，仲要去到北極跑193公里嘅超級馬拉松，絲絲佩服到五體投地，但如果絲絲話畀你聽，完成賽程嘅9位選手中有一位係女將，你會點睇？佢就係滙豐銀行香港區女高層Natalia Watkins。
「北極馬拉松」係近年新興嘅極地運動，難度不言而喻，除咗要應付嚴寒天氣，更加要跑完比標準馬拉松長約4倍路程，就算係男士們都無十足把握完成賽事；不過創辦者Mary Gadams表示，留意到近年愈嚟愈多亞洲女性報名參加呢類賽事。
Watkins就話，今次跑呢個馬拉松係想證明，無論金融界定係極限運動，雖然都由男性主導，但其實女性一樣可以做得好好！
今次Watkins就成功挑戰自己，用咗67小時就完成193公里嘅賽事，期間只係休息6小時！要做出咁嘅成績一啲都唔易，Watkins背後都付出好多。雖然佢每日都要工作11小時，但都堅持每朝五點半起身，去健身室跑一陣步先換衫返工。比賽過程中，Watkins亦有擔心自己會凍死或者畀狼咬死，好彩最後佢都可以咬緊牙關跑完全程。
余詩韻