立法會議員張華峰上個禮拜三同港交所（00388）行政總裁李小加喺飯局中「火併」單嘢仲有下文！絲絲收到料，雖然飯局都過咗幾日，但張議員嘅怒火仲未消退，唔會就咁算數，聽聞佢諗住同港交所主席周松崗以及財庫局局長陳家強「詐型」，仲要求李小加就佢嘅言論向立法會金融服務界嘅選民道歉咁話喎！
嘩！張議員又做乜咁扯火？有份出席當日飯局嘅人同絲絲講，今次張華峰真係畀小加「辣慶」咗，覺得小加當日話佢只係代表四百幾個經紀，咁小圈子，代表性不足，簡直係「侮辱」佢哋！佢哋反駁話，就算功能組別真係小圈子選舉，都係合法選出嚟，完全符合基本法！而熟悉李小加人士就話，小加當日唔係話佢哋小圈子嘅意思，只係覺得經紀要睇大局。
話說飯局當日，張華峰諗住幫經紀出頭，開口建議港交所減免報價機費用，點知小加好大反應話：「錢可以解決問題，畀晒你囉，當買平安！」擺明講晦氣話。出席飯局嘅人話，張議員覺得佢都係爭取合理權益，又唔係「勒索」，好難想像呢啲言論會出自堂堂國際金融中心交易所CEO把口！