愚人節過咗半個月多啲，尋日絲絲聽老友講大鱷索羅斯「百年歸老」，當堂都呆咗一呆，之後先知原來係有國際通訊社搞錯，今次真係大吉利是囉！
其實通訊社誤報都唔係第一次o架喇，好似○八年嗰次咁，另一家通訊社擺烏龍話蘋果公司嘅教主喬布斯過咗身，絲絲作為果粉嘅一分子，當時都好傷心，所以今次呢間通訊社知衰之後，急急抽番起大鱷篇死訊，仲灑晒冧咁say sorry，希望佢哋無下次喇。
好多通訊社都會幫啲名人寫定自傳、甚至訃聞，等當事人真係去世嘅時候可以即刻攞嚟用，絲絲對呢個做法無咩意見，但係睇番大鱷篇「訃聞」其實都幾搞笑。
篇嘢一開波就話大鱷係掠奪者，雖然佢喺金融界同投資界非常成功，九二年狙擊英鎊大賺超過10億美元，到依家仍然令人津津樂道，但整個人生又充滿矛盾、好似謎一樣咁難令人捉摸，同時佢亦都係一個大慈善家，多年嚟總共捐咗80億美金畀慈善機構咁話喎。