有「沽空大師」之稱嘅美國對沖基金經理錢隆斯（Jim Chanos）出名專睇淡中國經濟前景。今個月初，錢隆斯出席Mish Shedlock牽頭搞嘅Wine Country Conference，引用咗一張喺微博廣傳嘅漫畫「為了個蛋」，諷刺中國經濟增長，追求數據表現大於一切。
話說錢隆斯匯報時其中一張slide，講到中國GDP時，貼咗張睇落有少少恐怖、標題係「為了個蛋」嘅漫畫圖片。
呢張漫畫圖片係內地一位出名嘅漫畫家朱森林上載喺微博嘅作品，幅圖裏面有雙手用棍壓死隻雞，為咗要令隻雞生蛋，而隻蛋上面正正寫住「GDP」。絲絲就會解讀呢張漫畫圖片寓意「殺雞取卵」，即係話只貪圖眼前嘅利益。
中國首季GDP增長放緩至7.7%，絲絲都知道有唔少人跌眼鏡，錢隆斯用呢張漫畫，明顯想講嘅就係中國純靠堆砌GDP數據，唔係正路由經濟活動增長帶起GDP數據增長。
錢隆斯仲指出，喺二○○八年至二○一二年期間，中國就曾經過度投資水泥、鋼鐵、汽車等行業，反而導致不同程度嘅產能過剩問題。
錢隆斯以○一年唱淡沽空美國史上最大做假帳公司Enron而揚名，近年佢搖身一變為百分百唱衰中國嘅大淡友，由內地地方債問題、房市、銀行業及經濟，幾乎全部畀佢彈到「一文不值」，佢曾講過，中國GDP係計內地起幾多樓，唔係賣幾多樓，足以解釋點解內地有「鬼城」。
余詩韻