絲絲講場：趙麗娟開壇聽公事
會計師公會近年開親周年大會，都有個別年輕改革派會員乘機發難，舊年更成功突襲公會，否決咗部分議案，迫令會計師公會要開多一次EGM。會計師公會40年來首位女會長趙麗娟都要諗諗計，睇吓點樣安撫班會員。最近佢就決定出招，就係會計師公會將會由今個月開始，每逢月尾最後嗰個星期一，會定期舉辦會員論壇，等會員可以同公會加強溝通喎！
會公上下直接交流
第一次會員論壇已安排咗喺今個月29號舉行，公會講到明，會員可以喺論壇上直接與趙麗娟同公會行政總裁丁偉銓對話，幫助管理層更加了解會員嘅需要。今次論壇主題雖然係講吓公會未來5年計劃同理事會嘅工作，但會員亦都可以就住公會嘅事務自由討論，仲話好歡迎會員畀意見添。公會好明顯係釋出善意要「呵番」啲會員，不過唔知啲會員領唔領情呢可？
小加諗計經紀淡然
講起「呵番」會員，尋日港交所（00388）李小加總裁就同九大經紀團體同張華峰議員等飯局，席間小加話會諗吓辦法點樣幫業界，不過，業界就好似冇乜反應，笑住話咁就要等佢好消息喇。原來「呵番」人都唔係咁易o架！