絲絲講場：王良享：short樓有市場
點解近排金價跌得咁甘？絲絲嘅金融界老友都有唔同解讀，當中星展香港財資市場部高級副總裁王良享（Tommy）嘅分析真算係獨當一面喇，佢話係因為投資者short（沽）完歐債同日圓之後，要搵其他目標short就揀中咗金，所以金價咪下跌囉，佢仲講笑話如果可以short樓市，香港人應該會去short喎！
估金價唔會穿一千
尋日星展香港舉行品牌推廣發布會，席間Tommy同絲絲分享佢嘅投資心得，佢覺得金價喺每安士1,250美元頂得住，除非經濟出現大蕭條，有信心金價唔會跌穿1,000美元咁話，自己都可能會低位吸金添；但係佢對日圓就睇淡喇，認為被推高咗咁多年，家陣仲有排跌。
發布會上播出咗星展香港贊助嘅旅遊節目，講起旅遊，唔好睇Tommy文質彬彬，原來佢都係旅遊達人嚟o架！佢話自己會去意大利睇歌劇，仲即將會去韓國觀光添，依家日圓咁平，唔知佢幾時會去日本玩番轉呢？