Market Insight:跌近支持謀定後動

隔晚美國紐約聯儲四月製造業指數跌至3.05,比市場估計低,主要係新訂單數字下滑。瞓醒見美股大跌265點。奇怪係此指數向來殺傷力唔大,市後解畫話華爾街臨收市前波士頓發生爆炸事件,惹起恐襲疑雲。如果純粹出於此,影響相信只屬短暫。

中國公布首季GDP僅7.7%後,連日金融市場連鎖反應不絕,商品市場尤其金油跌勢誇張,澳紐等商品貨幣未能幸免。昨日世銀把中國經濟增長預測,下調0.1個百分點至8.3%。

內地經濟復甦步伐近期確實有放緩趨勢,GDP連續四季在7.7至7.8%之間窄幅徘徊,另一指標,中國國家能源局一至三月份全國全社會用電量,僅得4.3%低速增長,單是三月數字按年更得2%增長,是46個月以來第二最低,唔少芬佬信內地電力數據,多過官方每季一次的GDP,此作為經濟活動的寒暑表,經過一、二月春節因素影響後,三月升幅依然唔明顯,唔係太好兆頭。

內地餐飲業面臨洗牌

有解說話,兩會期間高排放及染污行業要停廠整頓,多少影響經濟活動。另外,國家主席習近平肅貪政策雷厲風行,限制公務及奢侈消費,唔少民生消費數據開始看到效果,貴州芧台跌到每瓶1,300蚊人仔,比舊年底下跌三成,官場送禮熱門──高級龍井及法國拉菲紅酒價格都要跌三至五成。

國統局數字顯示,頭兩個月年營業額超過200萬元人民幣以上大規模餐飲企業,營收比去年同期下跌3.3%,中國烹飪協會表示此乃七十年代開放改革以來首次,高級食肆為求存,紛紛轉往走中檔路線,唔少出到三折酬賓,睇番三月全國餐飲收入仲有8.7%增長,對小南國(03666)一類主攻普羅大眾的餐飲連鎖店影響相信唔會太大,但如果要畀太高估值,真係要諗清楚先。

古勝反而奇怪內地經濟復甦力度咁弱,通脹受控,並未見復燃危險,人行收水活動卻在持續,昨日正回購操作580億元人民幣,創春節後單日最多,美國聯儲局放水五年唔退市,就連聯儲局官員講吓都極為顧忌,中國卻連環收水,○九年中國4萬億元基建救市做了一次錯誤示範,希望今次唔會重蹈覆轍吧。

太保業務增長勝同業

美股大跌,港股昨日低開後表現唔錯,曾經倒升,美中不足係收市前軟番,跌100點收報21,672點,唔能夠以回升的628億元主板成交,炮製一次單日轉向,畀股民開心吓。

不過,恒指昨日低位21,475點,已經十分接近二月至今的下降軌道支持21,400點,吊頸都要抖吓氣,如果外圍平穩,短期彈番上22,000點水平應該問題唔大。

昨日保險股走勢悅目,鑑於H7N9疫情蔓延,中保監發出三則關乎禽流感及農業保險通知,保險公司紛紛發國難財推出疫情保險產品,升得最勁的中國太保(02601),啱啱公布三月份保費收入184億元人民幣,按年升12.9%,相比首三個月的4.1%增長,三月業務明顯增長加快,亦都好同業及市場預期。

睇番其股價由一月中32.5元,跌到近日在25至26元初見支持,昨低開高收,一舉升穿10日及20日線,分析員都睇好太保一三年及一四年業績,會由一二年低位50.7億元人民幣大反彈,估計賺96.6億及109.8億元人民幣,預期市盈率19.9倍,比上市後估值中位數26.2倍低一截,趁技術走勢突破及三月數據理想,短期不妨留意。

深圳股異動伺機跟炒

論板塊,昨日深圳股逆市做好,其中深圳國際(00152)股價升7.7%,收報0.97元,成交2.16億元;深圳科技(00106)收報0.38元,升7%;深控(00604)則升2%、深圳高速(00548)則升0.6%。不過,見到其他前海概念股未有異動,中集集團(02039)僅升0.1%,招商局國際(00144)更跌3.6%。

深圳股異動,會唔會同傳聞在上月底完成最後修訂的《深圳市全面深化改革總體方案(二○一三至二○一五)》有關,不得而知。在幾深圳股中,論人氣深國交投比較活躍,短線主要阻力位在50日線1元關,回吐守住昨日平均成交價0.95元可留意。

古勝