《福布斯》中文版嘅華人富豪榜尋日出爐，長實（00001）主席李嘉誠蟬聯華人首富之位，淨資產仲升超過兩成，去到310億美元。據《福布斯》所計，今年坐擁10億美元以上嘅華人富豪，都升多兩成有245位，連淨資產亦飛升至7,184.6億美元。
今次華人富豪搒，頭四位都嚟自香港，排第二位至第四位嘅，依次序係恒地（00012）主席李兆基、新地（00016）兩位聯席主席郭炳江與郭炳聯、新世界發展（00017）創辦人鄭裕彤。
早前收購平保（02318）股份嘅正大集團謝國民，以143億美元淨資產排第五，內地首富娃哈哈集團嘅宗慶后，以淨資產116億美元排第九，已經係排名最高嘅內地富豪。
咁啱胡潤研究院聯同興業銀行尋日出嘅《2013高淨值人群另類投資白皮書》，就話內地個人資產逾600萬人仔嘅高淨值人數，按年升速已放慢。
報告話，舊年因房地產調控兼股市持續低迷，高淨值人群中，炒房者及職業股民齊齊減少5%，拖累600萬人仔資產以上嘅高淨值人群只升4%，至280萬人。其中億萬人仔資產以上嘅更僅升2%，只得6.45萬人，都算係過去四年最低水準嘅一次。