絲絲講場：施伯樂龔鈁做埋理文
人力資源服務公司施伯樂（08260）喺創業板上市，絲絲都有去上市儀式，驟眼見到創辦人之一嘅龔鈁（David）似乎熟口熟面，原來佢除咗係施伯樂執董，仲係理文化工（00746）主席李運強嘅女婿，擔任緊理文手袋（01488）嘅執董添。
丁子高幫手做公關
唔講唔知，原來David仲同楊千嬅老公丁子高（Real）老友鬼鬼，Real近年積極進軍中港台三地嘅公關市場，撞正老友間公司上市，Real就梗係義不容辭幫手啦。Real仲同絲絲分享，話呢幾年公關行業變得好快，希望嚟緊可以為更多上市公司提供一站式公關廣告服務。Real喺娛樂圈人脈咁廣，唔知會唔會幫娛樂事業公司搞上市呢？佢就話近期都收到風，有台灣娛樂公司有興趣過嚟香港上市，如果成事相信台灣娛樂界一定會更加着重同香港方面溝通。