田國立多年以來嘅上司，就係著名嘅「救火隊隊長」、中信集團主席常振明，兩人當年喺建行（00939）開始發展至信達資產管理，以及中信集團，處理好多唔同嘅金融機構危機，田國立幫「常隊長」一齊救咗咁多年火，依家可以獨當一面出掌大行。
平級調動 地位大升
由信行轉去中行做董事長，話就話職位不變，但兩行規模同政策性地位完全不同，一旦成事，可以話等於田國立「紮職」。
雖然田國立執掌期間，信行業績麻麻，但係佢兼任中信集團副董事長兼總經理，旗下私募基金同證券業務又做得唔錯，正值內銀理財產品多事之秋，搵佢睇實海外業務同產品最多元化嘅中行，都算係適合人選。