Market Insight:氣氛偏淡觀望為上

周末禽流感未出現擴散,只係新增華東零星案例,加上美股跌唔落兼ADR做好,原本以為港股昨日至少彈番一、二百點,但點知恒指埋單仍微跌8點,恒指開市未幾即再創今年低位21,612點,反觀美股及日股愈快樂、港股就愈墮落,暫時仍係睇定先為上。

好多股民亦抱住觀望心態,所以昨日主板成交得580億元,沽空比率降至一成以下,牛熊證成交增55%至82億元,27隻恒指牛證被宰,若以牛熊證收回價分析,大戶再向下殺誘因不大。不過,博反彈亦只可量力而為,因為禽流感及金正恩屬「不可控制因素」。

萬眾關心A股昨日復市是否大跌,但A股再次印證其難估走勢,滬綜指最多跌近2%,但收市跌幅收窄至0.6%。其實內地股市利淡消息唔少,禽流感、南北韓局勢緊張、北京二套房貸收緊,台灣昨復市亦大跌2.4%,究竟係A股反應遲鈍,抑或港台反應過敏?

內地通脹憂慮漸減

現時日yen跌至98.5,離「破百」已不遠矣,日經大升358點再破萬三,日本三月服務業景氣判斷指數升至57.3紀錄新高,日圓貶值短期令經濟有改善,但藥力是否持久仍要放長雙眼,暫時全球股市係「雙贏」局面——美國同日本也文也武。

中國今日會公布三月份CPI,市場預測會回落到2.5%,而出口已連續三個月錄得高增長,所以未來兩日有機會「炒數據」,但港股仍係彈唔起令人失望。內地今年通脹似乎風險不高,商品價格至今仍然偏低,加上今次H7N9施襲拖低肉價,唔單止雞價跌,由於禽流感同黃浦江發現大批死豬嘅時間不謀而合,所以好多人對豬肉亦避之則吉,對CPI影響最大嘅豬肉價格自春節後持續回落,而豬肉股雨潤食品(01068)昨日股價再創4.32元新低。

美股防好消息出盡

昨日下跌股數仍多過上升股數,主要見弱勢股反彈,前20位升幅股票都超過10%、前50位超過6%,睇落相當不錯,但洗完倉應該冇咁快又炒過,屬死貓彈格局居多。紅色飛機股低飛完又升高少少,但飛機除咗驚疫症之外,更驚祖國取締「三公消費」,坐頭等倉嘅唔少係使公費,少咗呢班大豪客都幾大鑊。

港股業績期剛過,又到美國及中國企業業績期,A股已有六成公司「預喜」,最佳板塊料由電力股「冧莊」,最差板塊或係銷量與價格勁跌嘅白酒股。最多人關注係內銀股,中港股市估值其實由內銀股大幅拉低,今年內銀成績表未能樂觀,去年第二季內地兩次減息,今年首季淨息差肯定按年收窄,而中央近期整頓理財產品則對中小型銀行有較大影響。至於美股業績期慣例升多跌少,原因是盈利指引通常偏向保守,所以美股不排除旺埋今個月,下個月齊齊Sell in May。

新能源股見好要收

昨日指數反彈動力不足,但無礙個別中資股板塊逆市做好,如新能源股,大唐新能源(01798)曾升逾一成、中電新能源(00735)、華電福新(00816)以及華能新能源(00958)股價升幅介乎2.4至3.9%,國電科環(01296)及京能(00579)分別升10%及3.9%。

事實上,國策對新能源產業發展支持有增無減,早前國家能源局便下發《關於做好風電清潔供暖工作的通知》,明確指出將在北方具備條件的地區推廣應用風清潔供暖技術,此舉正是針對解決燃煤排放令北方冬季霧霾重重所帶來嚴重空氣污染問題,相信為實現「十二五」規劃內就節能環保所訂下的目標,未來將有更多政策支持使用潔淨能源。

  相對而言,有國策支持的新能源股受內地H7N9疫情的影響不太直接,故能吸引炒家短暫逗留。但如今市底虛弱,跟風短炒宜嚴限注碼,最好即日埋單計數,並須嚴守止蝕紀律。

古勝