絲絲講場：經紀約李小加打番場
嘈「夜期」嘈得最犀利嘅立法會議員王國興、證券及期貨專業總會、同埋證券及期貨從業員工會，尋日下午約見港交所（00388）行政總裁李小加。
港交所原本係想喺會面中釋出善意，盡量向佢哋解釋港交所立場，但據聞會議仍擦出一啲小火花！但畢竟大家都係成年人，最後兩個會嘅會員代表約李小加踢波，李小加亦爽快答應，仲話要去book場添！所以話呢，呢個世界真係圓o架！
話說兩個會喺會面前，call咗唔少會員「包圍」港交所，雖然最終只得廿人左右，但都無阻佢哋表達「還原食飯時間」、停止「夜期」等訴求。會議中，佢哋話非常擔心「夜期」會被人為操縱，損害散戶利益。王國興同時亦希望港交所能檢討諮詢文化同機制，唔好只聽大行，亦要重視本地中小行嘅意見。小加都不厭煩向佢哋解釋，會議開咗成兩粒鐘！
證監新劇靚爆鏡
另一邊廂，證監會下月就會推出電視劇《證義搜查線2》，全套六集，不過大家應該會更關心主角，因為佢哋搵咗近期唔少人氣急升嘅演員，好似「林峯嫂」千語baby，同埋近日緋聞多多嘅林德信。
佢哋喺劇中飾演證監會調查員。證監會查案，動作場面較少，文戲較多，但有靚女型男搭夠，應有一定睇頭！